Gratis konsert for alle
Torsdag 25. juni 2026 inviterer Sogn Sparebank og Jordeplerock til Smaojordeplerock
Kvelden byr på både lokale talent og etablerte artistar. Gunn Kvåle frå Sogndal, som er eit av dei mest lovande stjerneskota frå regionen, opnar showet før Freddy Kalas tek over scena og lagar feststemning for alle.
Freddy Kalas
Festkongen sjølv kjem til Smaojordeplerock! Freddy Kalas har teke Noreg med storm og når han fyrar opp med slagerar som «Pinne for landet» og «Jovial» så vert det fullt trøkk på dansegolvet!
Gunn Kvåle
Sogndalsjenta Gunn Kvåle har i fleire år skapt seg eit namn i norsk pop, og no kjem ho til Smaojordeplerock Med debutalbumet "Eit fullt møblert hjarte" og hits som julelåta "Heim til deg" og "Like I'm Made of Stone" leverer ho ektefølt musikk på sognadialekt so rører hjartet. Me gler oss!
Eit arrangement for fellesskap og inkludering
For Sogn Sparebank handlar Smaojordeplerock om å bruke samarbeid og kultur til å byggje fellesskap, og for å skape aktivitet og gode møteplassar for unge i Sogn, også dei under 18 år. Sogn Sparebank har vore hovudsponsor for Jordeplerock i mange år, og difor har samarbeidet vekse fram naturleg. Mykje også grunna felles verdiar.
– Både me og gjengen bak Jordeplerock ønskjer å bidra til at Sogn blir ein endå betre plass å bu og vekse opp i, å då er det så fint å kunne skape ein så kjekk møteplass i Lærdal på sumarstid, seier Tofastrud.
Foto: Jordeplerock / Liv Einemo
Foto: Jordeplerock / Liv Einemo
– Me kan få til det meste
Festivalsjef Stian Vatlestad er svært takksam for samarbeidet med Sogn Sparebank, både tidlegare og fram mot neste års arrangement. Han fortel at utan gode samarbeidspartnarar, hadde ikkje Jordeplerock klart å levere festivalar med såpass store artistar.
"Utan solide og trufaste sponsorar klarar ikkje me å overleve som festival. Me opererar på ein knivsegg økonomisk, der marginane avgjer om vi går i pluss eller minus. Her har Sogn Sparebank vore med oss i alle år, for det meste som generalsponsor. Dei har heile vegen heia på oss og sett verdien av det me gjer. Økonomisk er me avhengige av dei, og for oss som driv med dette på frivillig basis gir det utruleg mykje motivasjon å ha ei slik støtte år etter år."
